ኵዕሶ መርበብ ኣብ ናይ ኵዕሶ መርበብ ሜዳ እትጻወቶ ዀይኑ፡ ኣብ ማእከል እቲ ሜዳ ኸኣ 2.43 ሜተር ዝቕመቱ መርበብ ኣሎ። ሸሽዱሽተ ኣባላት ዘለውወን ክልተ ጋንታታት ከኣ ይጋጠማ። ነታ ኵዕሶ ብኢድካ እናሃረምካ ካብቲ ሸነኽካ ናብቶም መጋጥምትኻ ብልዕሊ እቲ መርበብ ትልእካ፣ እታ ኵዕሶ ኣብ ናይ መጋጥምትኻ ሜዳ ክሳዕ እትወድቕ ከኣ ከምኡ ትገብር።

ነታ ኵዕሶ ክትቀልዓ ከለኻ ካልእ ክፍሊ ኣካላትካ እውን ክትጥቀም ትኽእል ኢኻ፣ ክትስርብ ከለኻ ግን ኢድካ ጥራይ ኢኻ እትጥቀም። ነፍሲ ወከፍ ጋንታ ነታ ኵዕሶ ናብ መጋጥምቱ ቅድሚ ምቕላዑ፡ ሰለስተ ሳዕ ጥራይ እዩ ክትንክፋ ዝኽእል። ኣብ ናይ ውድድር ኵዕሶ መርበብ ንምስዓር፡ ሓደ ጋንታ ሰለስተ ዙር ክስዕር ኣለዎ፣ እቲ ናይ መጀመርታ ኣርባዕተ ዙር ድማ ክሳዕ 25 ነጥቢ ኢኻ እትጻወቶ። እታ ሓምሸይቲ ናይ መፈላለይት ግጥም ግና ክሳዕ 15 ነጥቢ ኢኻ እትጻወታ። ሓደ ዙር ንምስዓር፡ ካብቲ ናይ መጋጥምትኻ ጋንታ ክልተ ነጥቢ ዝለዓለ ነጥቢ ኽህልወካ ኣለዎ። ኵዕሶ መርበብ ምሉእ ዓመት ክትጻወቶ እትኽእል ህቡብ ዓይነት ስፖርት እዩ፣ ዓበይትን ንኣሽቱን ውድድራብ ኵዕሶ መርበብ እውን ይዳሎ እዩ።