ጸወታ ኵዕሶ በረድ ንሻኲ ዝመስል ብደረጃ ጋንታ ኣብ ሜዳ ናይ በረድ ዝካየድ ዓይነት ጸወታ እዩ። ተጻወትቲ ኣብ በረድ ሸተት እናበሉ ነታ ኵዕሶ ብፍሉይ በትሪ ይኽብክብዋ። ነፍሲወከፍ ጋንታ በትሪ ዘይሕዝ ናታ ሓላዊ-ልዳት ኣለዋ። ዓሰርተ ተሰለፍቲ ድማ ትውንን። ዕላማ ናይ’ቲ ጸወታ ንዅዕሶ ናብ ልዳት መቃናቕንትኻ ጋንታ ከምእትኣቱ ምግባር እዩ።

ኣብ ጸወታ ኵዕሶ በረድ እትዝውተር ዓይነት ኵዕሶ ንእሽተይን ብላስቲን ዝተሰርሐትን ከምኡ’ውን ናይ 6.5 ሰ.ሜ. ሰንጣቒት ዘለዋን ከባብን እያ። ተጻወትቲ ኰይኑ ተዓዘብቲ ብቐሊሉ ንኽርእይዋ ድማ ቀይሕ ሕብሪ እዩ ዘለዋ። ኣብ ርእሲ ሸተት መበሊ ሳእኒ፡ ተጻወትቲ ቍራዕ-ርእሲን ካልእ ካብ ማህሰይቲ ዝከላኸለሎም ነገርን ይዓጥቁ። ንውሓት ግዜ ጸወታ ኣብ ክልተ ነናይ 45 ደቓይቕ እብረታት ዝተኸፍለ እዩ። ኣብ ናይ ህጻናት ጸወታ እዚ ግዜ እዚ ብ 2 x 25 ደቓይቕ ይጐድል። ሸቶ በትሪ ተጠቒምካ ጥራይ እዩ ክምዝገብ ዝኽእል። ንዅዕሶ ብኢዱ ሒዙ ክገትኣ ዝፍቀደሉ ድማ ሓላዊ-ልዳት ጥራይ እዩ። እታ ዝበዝሑ ሸቶታት እተመዝግብ ጋንታ ተዓዋቲት ትኸውን። ኣብ እዋን ጸወታ ሰዓሪን ተሳዓሪን ምስዘይፈላለዩ፡ ድሕሪ ምዝዛም ግዜ ጸወታ ተወሳኺ ግዜ ይወሃቦም። በዚ ምስዘይፈላለዩ ድማ ብፍጹም ቅላዕ ከምዝፈላለዩ ይገብር።