Alpint er ei fellesnemning på skiidrett med ulike former for køyring i bratt terreng og blir kjenneteikna ved at heile skistøvelen er spent fast til skia. Dette skil seg ut frå andre skiidrettar som langrenn og skihopp der hælen på støvelen kan vippast på skia. Skiløp knytt til alpint skiidrett startar høgt oppe på fjellet og er dermed eit løp som går bratt nedover. Løypa inneheld ulike portar og hindringar som utøvarane må komma seg forbi før dei når mål. Rørsle og balanse er viktig for å meistra dette.

Det er om å gjera å komma seg fortast ned til mål, og utøvaren som klarer dette på kortast mogleg tid, vinn løpet. Hurtigheit er derfor også særleg viktig. Det er fleire ulike greiner innanfor alpint, der nokon av dei mest kjende er slalåm og super-G. Desse greinene liknar på kvarandre og går begge ut på at ein skal køyra nedover ein bratt, svingete løype med fleire portar så fort ein klarer. Forskjellen er at portane i super-G er sett opp med større avstand i tillegg til at bakken er lengre. Det blir arrangert både store og små konkurransar ein kan delta på der det er mogleg å køyra både slalåm, super-G og andre alpine greiner.