ተኒስ ሓደ ምስ ሓደ ወይ ክልተ ምስ ክልተ ኣብ ውሽጢ ወይ ኣብ ግዳም ዝጻወትዎ ናይ ኵዕሶ ጻውቲ እዩ። ተኒስ ኣብ 23.77 ሜተር ዝንውሓቱ ናይ ተኒስ ሜዳ ኢኻ እትጻወቶ፡ ናይ ገመድ ፍሕሶ ዘለዎ ራኬት ን ጻዕዳ ወይ ብጫ ዝሕብሩ ኵዕሶን ድማ ኢኻ ትጥቀም። ተኒስ ክትጻወት ከለኻ ነታ ኵዕሶ እናቐላዕካ ብልዕሊ እቲ መርበብ ከም እትሓልፍ ተገብራ። እታ ኵዕሶ ብቐጥታ ወይ ከኣ ኣብ ባይታ ሓንሳእ ሰጊዳ ትምለሰካ።

ጻውቲ ተኒስ ብፍጥነት ምንቅስቓስ ይሓትት። ስለዚ፡ ጽቡቕ ተጻዋታይ ተኒስ ንምዃን፡ ፍጥነትን ተጻዋርነትን ይሓትት። ብዘይካዚ፡ ነታ ኵዕሶ ናብቲ ሓደ ቀሊዕካ ንምስዳድ ቀላጽምካ ድልዱል ክኸውን ኣለዎ። እቲ ጻውቲ ዝጅምር፡ ሓደ ተጻዋታይ ነታ ኵዕሶ ብልዕሊ ርእሱ ሰንድዩ ናብ ሜዳ መጋጥምቱ ብምቕላዕ እዩ። እቲ ጻውቲ ድማ፡ ሓደ ካብቶም ተጋጠምቲ ነታ ኵዕሶ ቐሊዑ ክመልሳ ክሳዕ ዝጽገምን ነጥቢ ክሳዕ ዝስእንን ይቕጽል። ግጥማት ተኒስ ብጌምን ብዙርን እዩ ዝቝጸር። ኣወዳት ሓሙሽተ ወይ ሰለስተ ጌም ይጻወቱ፣ ኣዋልድ ግና ሰለስተ ጌም ጥራይ ይጻወታ። ኣብ ሓደ ናይ ጻውቲ ዙር ንመጋጥምትኻ ንምስዓር፡ እቲ መጋጥምትኻ ሰለስተ ነጥቢ ቅድሚ ምርካቡ ንስኻ ኣርባዕተ ነጥቢ ክትረክብ ኣሎካ። ሓደ ዙር ናይ ጻውቲ ንምስዓር ከኣ፡ እቲ መጋጥምትኻ ልዕሊ ኣርባዕተ ጌም ከይሰዓረ ኸሎ ንስኻ ሽዱሽተ ጌም ክትስዕር ኣሎካ። ክልተ ወይ ሰለስተ ዙር ምስ ሰዓርካ ድማ ኣብቲ ጻውቲ ተዓዊትካ ትብሃል።